用户:Richard923888/DC15工作区/大改善/岭南文化-粤
_flowers_in_Kolkata_W_IMG_4132.jpg)
Template:跳转 岭南文化（粤拼：Ling5 naam4 man4 faa3），又叫南粤文化（粤拼：Naam4 jyut6 man4 faa3）、广府文化（粤拼：Gwong2 fu2 man4 faa3）、或者珠江文化（粤拼：Zyu1 gong1 man4 faa3），系岭南地区（指五岭以南嘅地区）独有嘅地域文化。佢包咗广东、广西、香港、同埋澳门嘅文化。呢个词语一般都系指紧呢头嘅粤文化，但系广义上有得包埋区入面嘅客家文化、潮州文化、同埋广西嗰啲少数民族文化。
喺地理上，岭南地区系亚热带气候（Subtropical climate），天气又暖又潮湿，比起同样系畀山隔开嘅福建多农地，坐正喺珠江呢条大河上面，自古以嚟又靠海揾食同成日同外界搞生意，所以佢嘅地方文化偏向系农业文化、海洋文化、同商业文化。再加上佢喺发展嘅过程入面吸收咗好多西欧传嚟嘅文化，令到岭南文化同其他华人地区嘅文化好唔同，最明显嘅系喺七方面：语言（主力系广东话）、建筑、美术、工艺、演艺、文学、同埋饮食文化。除咗呢啲，岭南重有好多独特嘅风俗（好似系喺过年嗰阵行花市或者系执骨嘅习俗）同埋流行文化。
中国社会科学院喺 2006 年深圳咸头岭新石器时代遗址嘅考古工作掘到好多红烧土、陶质生活工具、同埋石器。科学测定话岭南地区喺 6000 至 7000 年前嘅新石器时代中期嗰阵已经有人住，而且重有一定程度嘅文明。根据呢个发现，珠江文明嘅历史可以推算到公元 5000 年前（距离而家 7000 年前），悠久历史唔謯过黄河文明同长江文明。
总体特色
[编辑]对外开放
[编辑]喺好耐之前，岭南已经对外开放，南海神庙有波罗国使者嘅雕像，喺西来初地重有达摩祖师嘅遗迹（达摩祖师系波斯人）。因为自古以嚟岭南地区一路同外国做生意，再加上离中原心脏地带（北方）远，呢一带好多时都系接触各国嘅人多过北方中原人，所以有好多非中原嘅宗教同思想传咗入嚟。佛教、道教、好几派嘅基督教、回教、同各种自然祟拜喺呢一带度百花齐放。好似系拜孔孟呢啲中原嘅宗教仪式反而好多时都喺岭南唔兴。除咗咁，岭南画派同广东菜等都吸咗好多西欧文化嘅元素喺入面。呢啲都表现咗粤人肯包容同接纳外来文化。
睇重商业
[编辑]近呢千几年嚟，岭南地区响好几个朝代都系做中原皇朝嘅主要对外港口（尤其系对东南亚）。所以粤人好多时都系要靠行船行商揾食，广州同佛山变咗做大商埠，再加埋后起之秀嘅香港，对外行商一路以嚟都系粤人嘅经济命脉。粤人好多都为咗做生意搬咗去东南亚度住，近嘅去越南或者泰国，远嘅有啲去到印尼同澳洲－令到海外华人一路都系粤人占咗多数。岭南重出咗好多人识嘅广东商人帮。呢啲地理文化特色令到粤人偏向讲着数，睇重商业发展。
点嚟
[编辑]
由百越到汉化
[编辑]喺公元前 110 年嗰阵，控制住岭南地区同而家越南北部嘅古国－南越国 [1]－畀汉朝帝国打冧咗，令到呢笪地喺历史上第一次做咗中原皇朝嘅领土。虽然系咁，嗰时已经有百越族（粤拼：Baak3 jyut6 zuk6）喺呢一带度住。后嚟喺 7 至 13 世纪（大唐同大宋嗰段时期），因为中原嗰头畀胡人大规模侵略，搞到有大批古汉人（百越族因为汉文化程度唔够，唔畀人当系汉人）走难去咗岭南度住。打后嗰几个世纪，岭南嘅古汉人同百越人一齐住兼通婚，令到岭南文化有齐百越文化同唐宋文化嘅元素喺入面：好似系今日嘅广东话，佢保留咗少少百越话嘅特征，但系总体又好近唐宋人讲嘅中古汉语，重攞得嚟读唐诗宋词。
呢样嘢亦都反映咗喺血统上面：直至廿一世纪，粤人普遍都有齐古汉人同百越人嘅血统[2]。
做咗汉人
[编辑]虽然话 13 世纪嘅岭南喺文化上系汉化咗，但系蒙古人统治嘅大元帝国将岭南嘅人分类做南人而唔系汉人，而且地位重要低汉人一等。要喺成 15 世纪左右（大明时期）开始，粤人先至正式畀人承认系汉人。喺嗰时，岭南地区因为靠海又近东南亚，做咗大明同西欧人做贸易嘅主要港口，吸收大明文化之余重学咗好多西欧文化。好似系岭南画派咁，就系揉合咗远东嘅国画同埋西欧嘅水彩画而变出嚟嘅新风格，广东菜亦都吸收咗好多西人嘅煮嘢食方法。由嗰阵时开始，岭南文化就一路咁发展，喺建筑、美术、工艺、演艺、文学、哲学、同生活文化嘅层面都有唔差嘅成就。
摩登时代
[编辑]喺廿世纪中期开始，英属香港喺各方面都进步得好快。东方之珠嘅成就令到好多粤人都对香港好向往。香港嘅广东话流行文化（包括流行曲同戏）喺岭南地区有好大嘅影响力，例如系好多住喺中国大陆嘅粤人都钟意收睇香港拍嘅戏同电视剧，而且重会学香港人咁用繁体字写嘢。而喺香港方面，因为香港人同其他亚洲国家嘅商业、文化、同学术交流得多，吸咗好多日本、韩国、同台湾嘅文化。好多香港人都当食寿司或者其他日本嘢食系家常便饭，重将“达人”、“駅”、同“の”（意思系“嘅”，粤音系 zi1）呢啲日文字加咗入自己嘅日常用语里面，形成咗所谓嘅“港式广东话”。
传统语言
[编辑]广东话
[编辑]响岭南最有人气嘅语言系广东话（粤拼：Gwong2 dung1 waa2；又叫“广州话”）。岭南嘅传统戏曲同民歌多数都系用广东话嚟去唱同表达嘅。广东话嘅历史有得追溯到去公元前嘅南越国时期。当时住喺岭南嘅系百越族，佢哋讲嘅话唔属于唐话。但系后尾佢哋畀中原王朝统治，跟手唐朝同宋朝嗰时又有大批古汉人搬咗去岭南住，汉越杂处，令到广东话慢慢成形做一种有唐话嘅文法同发音，但又保留咗些少百越特色嘅独特语言：今日嘅广东话系中古汉语（Middle Chinese）－即系唐宋人讲嘅话－嘅直系后裔。佢明显似唐话：砌句子啲规则同吴方言、闽南话、同客家话有好多明显似嘅地方；佢重保留咗好多中古汉语嘅音，读得到唐诗宋词－而呢样嘢普通话反而做唔到。但系广东话嗰啲日常用语入面都重见到啲百越话嘅特征（呢点同越南话好似），好似系喺文法上广东话有时会将修饰语放响个名词后面。总括嚟讲，现代广东话保留到唐宋嘅遗风得嚟，又唔会话完全冇晒百越嘅特色。
广东话近亲
[编辑]虽然系咁，广东话唔系岭南地区唯一有人讲嘅话。首先，岭南有四邑地区嘅台山话（粤拼：Toi4 saan1 waa2）同广西嘅广西平话（粤拼：Gwong2 sai1 ping4 waa2）。呢两种话同响广州同港澳地区讲嘅标准广东话好似，但又唔完全互通。喺语言学上嚟讲，如果两种话倾到偈，佢哋就系同一种话：例如系英式英文同美式英文，佢哋虽然系有少少分别，但系英国人同美国人倾偈冇问题（互通性接近百分之百），所以系同一种话；而英式英文同德国话虽然都系由古代嘅日耳曼族讲嘅话演变出嚟，但系而家佢哋嘅分别大到完全倾唔到偈（互通性差唔多系零），所以系唔同嘅话。相比之下，台山话同广西平话嘅情况就有啲暧昧：佢哋同广东话好似，倾到啲偈，但唔见得系完全互通（互通性大约系百分之五十），而且台山话重有自己嘅一套民歌。所以啲学者重拗紧：佢哋有时会将台山话同广西平话当做广东话嘅分枝，有时会将佢哋当做第种话。
其他语言
[编辑]广东重有好多客家人，佢哋嘅客家话都系属于唐话。但系因为响好耐之前佢哋就同广东话分开咗独立发展，今日嘅客家话同广东话已经有好大分别，两种话完全倾唔到偈。而且客家文化喺建筑、音乐、同饮食呢啲方面都明显同粤文化好唔同。海南同潮州亦都有属于闽语系嘅海南话同潮州话。最后，广西亦都有好多少数民族，其中最显眼嘅系壮族，佢哋都有自己嘅话，而且都唔属于唐话。
建筑
[编辑]
岭南建筑（粤拼：Ling5 naam4 gin3 zuk1）好有地方特色。同中原核心地带（即系北方）比起上嚟，岭南地区嘅气候又热又湿立立，如果将中原嗰套建筑风格直接搬落嚟嘅话，会好容易有温度唔舒服或者发霉呢类湿滞嘢。所以粤人整咗一套同中原人唔同嘅建筑风格。古典岭南建筑通常比较轻，而且会用通透同冇咁易发霉嘅材料起，色水会偏好灰白或者系绿呢啲柔和嘅色调。喺结构方面，呢啲建筑通常有多层嘅斜坡顶同方形柱，而且因为气候冇中原地方咁冻，令到嗰度啲人钟意向外面行，所以岭南民居建筑就发展咗好多露台呢类嘅开放式结构，等人有得唞凉。总体嚟讲，呢柞特征令到古典岭南风格嘅建筑物望落都比较轻同凉爽。就算到咗今日，古典岭南式建筑物喺广州呢啲大城市嘅商店街成日都会见到。
方位同门
[编辑]粤人喺起屋嗰阵好讲究方位，主要系畀强烈嘅风水文化形响咗。粤人起屋嗰阵好多都会请返个风水师去搞布局。佢哋喺门方面零舍执着－佢哋重有句俗语话“大门朝南，子孙不寒，大门朝北，子孙受罪”：间屋嘅门面向南会畀人觉得系象征住权力同威严，所以一般起屋（尤其系比较有钱嘅人家）都会特登将道门向住南面，而祠堂基本上一定会咁做。大啲嘅屋企建筑重会有好几种唔同嘅门，好似系中门、侧门、同仪门呀咁。“中门”响旧时通常都净系会畀身份地位比较高嘅人－即系屋企嘅男主人、高官、或者抱住男丁嘅女人－行过，而其他人就净系准用“侧门”。“仪门”就系祠堂好多都会有嘅；喺大门之后重有第二道门。呢种门嘅存在主要系因为粤人好多都觉得一入大门就直冲祖先会好肉酸。
雕塑装饰
[编辑]传统上，粤人好钟意用雕塑同浮雕嚟装饰建筑物。同其他唐人起嘅祠堂比起上嚟，粤人嘅祠堂就钟意摆好多用木头同石头整嘅人物灵兽雕塑去做装饰，嚟达到“光宗耀祖”嘅效果。岭南建筑雕刻主题好多样，有历史故事、神话传说、吉祥图案、飞禽走兽、奇花异草呀咁。亦都有啲比较有本地特色嘅景物，好似系洋桃、番石榴、香蕉树、木棉、同榕树呢啲岭南地区成日都见到嘅生果同植物。
青砖
[编辑]青砖（粤拼：Ceng1 zyun1）系喺岭南地区好多人用嘅建筑材料。佢呈青黑色、密度高、透气、吸水、抗氧化、净化空气，又唔容易变色变形，重好恒温。因为佢呢啲特性，用青砖起嘅屋好捱得到湿气，夏天嗰阵又会好凉爽－最啱用嚟喺又热又潮湿嘅岭南地区起屋。
锅耳屋
[编辑]锅耳屋（粤拼：Wo1 ji5 uk1）系岭南建筑好样眼嘅特征。好似系下面个图集入面嘅曾大屋咁，佢哋嘅屋顶两边度有对形状好似锅嘅手柄嘅墙凸咗出嚟－所以嗌做锅耳屋。响 15 世纪左右（大明时期）开始，锅耳形嘅墙系有功名嘅人先有得喺屋企度起嘅嘢，而佢哋嘅高低表明咗嗰个人嘅官位。后嚟民间粤人重有咗喺间屋度起锅耳形嘅墙可以帮自己啲仔同孙做官嘅谂法。但系嗰对锅耳重有实际嘅功用，例如系起到防火烛同遮太阳嘅作用；后者可以令太阳冇咁容易直接晒住间屋嘅表面，帮手令间屋冇咁热－呢点喺热辣辣嘅岭南地区特别有用。
岭南园林
[编辑]
岭南园林（粤拼：Ling5 naam4 jyun4 lam4）系岭南独具一格嘅园林设计[3]，当中最有代表性嘅要数广东嘅“粤中四大名园”－余荫山房、佛山梁园、可园、同埋清晖园。
传统嚟讲，岭南地区山水靓又临海，有五岭阻住，环境同北面嘅中原核心地带好唔同，所以发展咗一套自己嘅风格唔出奇。岭南地区又热又成日打风落大雨，所以粤人起园林嗰阵多数会用庭院式布局－用建筑物将个庭园围住嗮，令到园林入面嘅花草受到保护，打风落大雨嗰时冇咁易畀啲风雨吹烂打烂，而且重可以用呢啲植物嘅阴影帮成笪地降温。地理特征亦都令到岭南园林喺规模上面比较细，又唔似得中原嘅园林咁样畀啲皇家常规制度限住嗮（即系俗语所讲嘅“山高皇帝远”）－佢会拣用木棉树呢类有本土特色嘅植物同埋用好多木雕同陶瓷呢啲民间工艺品去做装饰，好似广州喺廿世纪初起嘅宝墨园就系咁。而且因为佢哋细，好少有山土，所以成日都会“以石为山”－用石头做假山，例如系余荫山房就用咗呢种手法。总体嚟讲，呢柞特征令到岭南风格嘅园林比较贴近大众同朴素。
除咗咁之外，岭南园林喺好多方面见到西欧文化嘅影响。喺理水方面，岭南园林唔会好似江南园林咁用自然池形水面。佢哋啲水池反而会好似西式园林咁形成规则嘅几何图案。再用余荫山房嚟做例子，佢由两个规则形状嘅水池并列做水庭，环绕八角亭嘅水渠两边用园径同花圃散点山石，重有荔枝同大树菠萝呢啲有岭南特色嘅植物。喺装饰方面，岭南园林入面成日都会见到好似系拱形门窗、欧陆式柱头、或者有色玻璃呢啲西欧风嘅饰物。所以岭南园林亦都体现咗西人对岭南文化嘅影响同埋粤文化对外开放嘅特征。
-
余荫山房嘅深柳堂 -
广东佛山嘅梁园 -
广东东莞嘅可园 -
宝墨园嘅紫洞舫用咗好多浮雕。
唐楼
[编辑]除咗呢啲古色古香嘅建筑，有西欧风味嘅多层式建筑物唐楼（粤拼：Tong4 lau4）亦都系岭南地区响 19 世纪开始出现嘅建筑类型。佢哋主要系起嚟畀平民下铺上居咁样住，喺好似系香港同埋澳门呢啲畀西欧文化影响得犀利啲嘅地方周围都见得到。香港啲唐楼多数都有三到四层，每层大约系四米高左右。佢哋初头多数系用青砖起，而后嚟喺 1930 年代开始变成主要用混凝土。第二次世界大战之后，香港嘅人口升得好劲，嗰时啲人唔够屋住，于是乎好多唐楼都畀人攞咗嚟整板间房。通常喺一座唐楼嘅住户度都会有一户负责做“包租”，令到港式广东话入面多咗“包租公”同“包租婆”呢两个词语。
唐楼住户嘅生活喺啲有港澳特色嘅戏同电视剧入面成日都会睇到。
唐朝建筑
[编辑]头先讲到，岭南文化受大唐同大宋嘅汉文化影响得好犀利。喺 4 至 10 世纪（隋唐时期），有好多中原嘅高僧都会走嚟岭南度传佛教，所以令到岭南有啲有唐朝建筑（粤拼：Tong4 ciu4 gin3 zuk1）元素嘅佛寺，好似系广州嘅光孝寺就系咁。而且自从 19 世纪以嚟，粤港地区重起咗唔少新嘅唐朝建筑。呢种建筑风格出咗名规模宏大、规划严谨、色调简洁、主要用木头做料、又会将艺术性同结构性嘅设计融合埋一齐。例如系香港喺廿世纪初嗰阵时起嘅志莲净院，就系攞咗唐朝嘅建筑做板起嘅。佢同古典岭南建筑好明显唔同：佢规模好宏大－会有好多向外扬嘅造型，又会用金同红呢啲鲜艳嘅颜色（古典岭南建筑系四四方方兼且色水淡嘅）－而且大半都系用木整嘅。呢柞特征令到成栋嘢望落同日本京都嘅佛寺群（都系用唐朝建筑做板嘅）好似[4]。而中国大陆嘅粤广地区由 1980 年代都开始起呢类建筑物，例如系深圳文博馆。
-
广州光孝寺嘅鼓楼 -
光孝寺大雄宝殿嘅东侧 -
香港志莲净院嘅天王殿 -
志莲净院嘅万佛塔；望落同京都法隆寺嘅五重塔好似。
美术
[编辑]
岭南嘅人喺汉化咗之后就一路都有搞美术，出咗几个独有嘅美术流派。
岭南画派
[编辑]岭南画派（粤拼：Ling5 naam4 waa2 paai3）系响 19 世纪尾开始有嘅一个画画流派[5][6]。虽然佢历史唔算系好久远，但系就好有自己嘅特色。佢系由畀人嗌做“岭南三杰”嘅高剑父、高奇峰、同陈树人搞起嘅。呢个流派系建基喺历史悠久嘅国画上面，再加埋西人嘅水彩画风演变出嚟嘅一个风格。呢个风格嘅画讲重留白，而且因为运用咗由西欧引入嚟嘅水彩技术同印象派（Impressionism）思潮，会有一啲好鲜艳嘅颜色同埋用光嘅表达手法，同“萧条淡薄”嘅国画起到强烈嘅对比。好似系高剑父画嘅《东战场的烈焰》，佢就用咗水彩油嘅鲜红色嚟代表战火，再加埋位置上巧妙咁留咗白，令到画面白色嘅位置似烟又似云，等睇画嗰个人有得自由咁去想象幅画嘅内容。
岭南书风
[编辑]岭南书风（粤拼：Ling5 naam4 syu1 fung1）即系粤人写书法嘅风格[7]。呢种书风一般都畀评论家形容系“大胆”、“浪漫”、又“有风骨”－都算受人景仰，但系佢嘅历史都几多波折：喺公元前南越国啱啱畀汉朝打冧嗰阵，岭南嘅人已经有喺度写书法。但系岭南天气热辣辣又湿立立，啲纸两嘢就又霉又烂，搞到早期嗰啲岭南书法都冇乜留得到落嚟。打后嗰一千年，虽然话岭南嘅人有响度刻石碑，而考古学家都揾到啲用墨写嘅书法，但系重系出唔到特别有料到嘅书法家。要一路去到成 15 世纪，岭南出咗畀人嗌做白沙先生嘅陈献章，岭南先至真系叫做有一套畀人认同嘅书法风格。虽然系咁，岭南嘅书法家都重系好少可会专攻书法，就连陈献章佢本人主要嗰份工都系哲学家，而唔系书法家。跟住嗰啲岭南嘅书法家又多数都系打第二啲工做正职嘅－好似系哲学家、诗人、或者画家呀咁，得闲先会搞书法。虽然系咁，岭南都出过有啲朵嘅书法家同书法作品，例如系：
- 陈献章，1428-1500 年，出身新会，出名写字嗰阵好好力水；佢曾经用新会圭峰山生出嚟嘅茅草自己整茅龙笔写书法，而茅龙笔（全名叫“白沙茅龙笔”）家阵已经做咗新会嘅名产。
- 邝露，1604-1650 年，出身南海，识好多种唔同体嘅书法；佢嘅诗画作品《袁崇焕督辽饯别图诗》系佢喺 1628 年送别佢嘅死党袁崇焕嗰阵画写嘅。据讲呢幅作品而家收埋咗喺香港。
- 张乔，1615-1633 年，喺广州出世，出咗名又靓又琴棋书画乜都识嘅大才女，但系得嗰 19 岁就病死咗；佢留落嚟嘅诗画才品《南园诸子送黎美周北上诗卷》而家收藏咗喺广州美术馆。
响廿一世纪，广东嘅粤人开始更加认真咁去研究岭南书风，睇个势似系想搞大佢。
岭南盆景
[编辑]岭南盆景（粤拼：Ling5 naam4 pun4 ging2）系岭南独有嘅盆栽艺术风格。呢个风格虽然话去到成 1930 年代先有人正式咁承认佢嘅存在，但系佢其实有成千年历史，有得追溯去到 11 世纪。嗰时嘅中原皇帝宋哲宗将好出名嘅文人苏东坡眨咗去广东呢笪“南蛮之地”。虽然系畀人贬咗，但系据讲苏东坡一到步就即刻大赞岭南山水植物靓（“岭南万户皆春色”），而佢本人系盆栽发烧友，写咗好多讲盆栽嘅诗。睇返纪录，粤人喺至少 15 世纪（大明时期）开始民间已经有唔少人钟意整盆栽艺术。而到咗今日，岭南盆景已经有咗自己独有嘅一套风格。除咗会用啲有本土特色嘅植物品种之外，佢嘅特色系讲求人工同自然嘅配合：例如系岭南盆景艺术家好多时会好揼心机落去帮棵植物（自然嗰部分）拣返个同佢夹得埋嘅盆（人工嗰部分）；喺处理棵植物啲枝叶嗰阵会好有技巧咁用修剪令到棵嘢跟住个艺术家嘅意愿嚟生，生完一轮之后新生出嚟嗰啲枝叶又会啱啱好将修剪嘅痕迹遮住，令到成棵嘢望落好自然。有人话咁就好似岭南嘅作风－“山高皇帝远”，粤文化唔会畀啲人工嘢同制度限住。
岭南盆景艺术喺广州同香港呢啲岭南嘅大城市都有唔少人支持，重有好似香港岭南盆景艺术学会呢类组织喺度搞。
工艺
[编辑]喺岭南地区重未汉化嗰时，啲百越人已经喺度整好多唔同嘅雕塑同陶器，而呢啲工艺技术喺汉化咗之后只有变得更加精湛。到咗今日，岭南嘅各种工艺品已经系去到世界级嘅水平。佢哋嘅产品卖到去全世界好多地方，而且啲产品唔净只得雕塑：重有刺绣、彩瓷、剪纸、草席、风筝、贴画、同埋家俬。当中最出位嘅有几种：
潮州木雕
[编辑]
潮州木雕（粤拼：Ciu4 zau1 muk6 diu1）系喺岭南好出名嘅工艺。佢系由属于闽系嘅潮州人搞起嘅，而家吓连粤人都喺度搞。呢种工艺历史好悠久：喺 11 世纪嗰阵大宋已经有文献记载呢种工艺，而且有钱人家唔少都钟意买嚟装饰自己屋企。去到 16 世纪尾，呢种工艺开始喺民间度普及起上嚟，好多祠堂同庙都会揾金漆潮州木雕做装饰，重有好多岭南以外嘅地方嘅人帮衬。金漆木雕通常会揾啲实净得嚟又坚韧嘅木头（好似系樟木、杉木、柚木呀咁）嚟做料，画完幅草图之后就由大到细咁去将旧木头雕做想要嘅样，成咗形之后至跟手上金漆。
广州玉雕
[编辑]广州玉雕（粤拼：Gwong2 zau1 juk6 diu1）系粤广地区嘅民间玉雕工艺。佢有成过二千年历史－考古学家喺南越王墓发现咗百越人整嘅玉雕[8]。而响汉化之后，岭南嘅人有学整大唐嘅玉雕祭祀神器，重继承咗大宋嘅七巧色玉技艺。今日嘅广州玉雕主要用啲岭南周围嘅玉材，好似系呈草绿色嘅南方玉咁。呢种风格嘅玉雕出咗名“庄重”、“轻盈”得嚟又“玲珑剔透”。而且粤人重发明咗一种叫“留色”嘅特技，雕嗰阵会保留住原本嗰旧玉嘅天然色水，凿出一啲色彩鲜艳得嚟又自然嘅作品。喺两广地区，广州玉雕最常系用嚟整首饰同埋摆设。粤人重成功整到“玉球”─一种入面有十几廿层，用玉造嘅波─呢种特殊嘅工艺品。
广州牙雕
[编辑]
广州牙雕（粤拼：Gwong2 zau1 ngaa4 diu1），又叫做南派牙雕，系另一样岭南地区好有朵嘅工艺品。佢系一种有超过两千年历史嘅工艺技术。呢种工艺起源喺秦汉时代嗰阵嘅中原地区，后嚟传咗去岭南地区。后尾粤人重发展咗一套自己嘅风格。呢种雕塑系攞象牙做料，佢用咗大笨象身上最硬嗰部分嚟整出一啲好似玉咁通透但系又硬净嘅雕塑，而喺气候温和嘅岭南地区，广州人重有咗出名精细得嚟又唔会脆嘅“广州牙雕”，甚至重叻到成功整出咗畀人嗌做“鬼工”嘅工艺品－象牙波。
虽然话牙雕工艺的确系好劲，但系自从喺 1980 年代开始，大笨象畀想攞象牙嘅人系咁捕杀，搞到世界好多地方嘅人都开始觉得用象牙整嘢唔系咁好。国际社会度重话咁快立咗法，唔畀人买卖象牙或者系用象牙做料整嘢。于是乎而家嘅粤人就开始咗去揾一啲代替品－质地似象牙但又唔系象牙嘅料－嚟去传承呢种古老嘅工艺。
粤绣
[编辑]粤绣（粤拼：Jyut6 sau3）系粤广地区嘅刺绣工艺，喺广州、佛山、番禺、顺德、东莞、以至台山呢啲地方都有一定嘅支持度[9]。呢种工艺有成千年历史，最早可以追溯到去公元 9 世纪。嗰阵岭南地方汉越共处，畀当时控制住中原嘅大唐统治紧，相传话唐顺宗手下就有一个嚟自南海嘅 14 岁女仔，佢喺刺绣方面嘅技术犀利到可以完美咁将《法华经》刺出嚟，啲字重要系得“粟粒”咁大。嗰阵时之后，岭南嘅民间就有整刺绣工艺，重出埋自己嘅风格。喺 16 世纪有讲到葡萄牙嘅生意人喺岭南将粤绣买咗返去送畀自己嘅国王，重要畀国王赞。喺跟住嗰几百年，粤绣就一路发展一路卖畀世界好多地方嘅人，做咗喺欧洲嘅贵族同有钱人之间好多人钟意嘅东方饰物之一。
除咗有自己独特嘅一套针法技巧，粤绣亦都有显眼啲嘅特征：佢一般嚟讲远睇都好样眼，近睇就好精细，纹理清晰，画面多嘢得嚟又唔会觉得乱糟糟，而且色水好鲜艳。喺岭南地区，粤绣有得纯用嚟做装饰，但系又有用嚟做生活用品或者系做大戏嘅戏服呢啲实际啲嘅用途。
广彩
[编辑].jpg)
广彩（粤拼：Gwong2 coi2），全名叫做广州织金彩瓷，系一种喺白色瓷器上面加彩绘烧出嚟嘅工艺品。佢出咗名色彩绚烂，画工又精细。呢种工艺开头系喺 16 世纪尾嘅大明时期，当时啲粤人由江西景德镇嗰度运啲白瓷过嚟，再喺广州嗰度帮啲瓷器油颜色、加图案、再烧制。喺佢身上睇得到明朝文化嘅影，但系又加咗啲西人嘅风格喺入面，例如系《竹园陶说》就咁样讲：“清代中叶，海舶云集，商务聚盛，欧土重华瓷，我国商人投其所好，乃于景德镇烧造白瓷，运至粤垣，加雇工匠，仿照西洋画法，加以彩绘，于珠江之河南，开炉烘染，制成彩瓷然后售之西商。”
广彩后嚟重扩展咗去岭南嘅其他大城市，例如香港就喺 1930 年代开始学广州咁搞广彩。香港人开咗好几间厂整广彩，啲成品重出口去到美国、西欧国家、南美、东南亚、大溪地、同马达加斯加呢啲地方。到咗廿一世纪，香港嘅广彩业因为大陆嘅粤广地区开始识整广彩而开始冇乜点再搞，但系都重有啲瓷艺发烧友喺嗰度尝试紧将呢种工艺搞落去[10]。
-
广彩花鸟瓷盘 -
广彩村姑采樱图碟 -
广彩盖罐
广式家俬
[编辑]广式家俬（粤拼：Gwong2 sik1 gaa1 si1）系岭南独有嘅整家俬风格。佢喺大明时期嗰时发源，系运用咗岭南嘅本土木材、唐宋时代嘅汉人家俬、再加啲西欧艺术风而整出嚟嘅一种新风格。佢嘅用料主要系紫檀木、黄花梨、酸枝木、同鸡翅木呢类木材，通常每件家俬都系用一旧大嘅木头一嘢过凿出嚟，令到每件广式家俬都净系有一种木，而且好少可会有接驳嘅痕迹。呢种家俬重会有啲西方家俬嘅曲线同埋大面积高浮雕，借咗啲西人嘅巴洛克（Baroque）式同洛可可（Rococo）式花纹，又会有啲好似潮州木雕咁嘅粤式图案雕刻，同埋钟意镶好多啲好似系贝壳、云石、陶瓷、珐琅、或者玻璃画呢类嘅装饰物上去，形成咗唐西合璧。到咗廿一世纪，广式家俬已经做咗岭南嘅其中一样特产，其他华人同外国人都会帮衬。
剪纸
[编辑]剪纸（粤拼：Zin2 zi2）系另一样喺岭南好多人整嘅工艺，尤其系佛山搞得零舍叻[11]。呢种工艺喺大宋时期尾嗰阵开始有。佢本来只系用嚟做大节日嗰阵用嘅装饰，后嚟啲人开始拎去卖，令到佢变咗做一种有商业价值嘅工艺品，喺窗花以至鞋花呢啲地方都会有人用。佛山剪纸嘅题材多数系啲平民化嘅嘢，包括神话、动物、吉祥图案、或者系岭南风土呀咁，色水好多变，主要系鲜艳嘅红色，但系就连比较清淡嘅灰同绿都会有。大时大节嗰阵，粤人上下都会用好多唔同大细嘅鲜艳剪纸做装饰，好有节日气纷。
高州角雕
[编辑]高州角雕（粤拼：Gou1 zau1 gok3 diu1）系岭南喺 1960 年代开始有嘅工艺品。佢一开头就好受欢迎，卖到去港澳同日本，甚至乎系包埋英国在内嘅廿九个国家同地区。佢系用各种水牛或者系山羊嘅角做料嚟作雕塑，有啲会将只角切做细丝或者薄片，整出好多唔同嘅样。
交趾陶
[编辑]交趾陶（粤拼：Gaau1 zi2 tou4）系一种喺广东起源嘅低温彩釉软陶工艺，成日都会用嚟整啲公仔或者雕像喺庙宇度做装饰。呢种工艺家吓喺两广地区已经唔多见得到。但系佢喺 19 世纪传咗去台湾，而台湾人亦都重喺度传承紧呢种工艺。
演艺
[编辑]既然岭南地区讲嘅话咁独特又咁有历史，呢一带啲人唱嗰啲歌仔自然都会有独到嘅风格。自从几个世纪之前开始，岭南地区已经有咗好多唔同嘅戏曲，好似系大戏、广东汉剧、同埋采茶戏呀咁。当中大戏个势最劲，有好多海外嘅粤侨都钟意听，有时甚至乎连粤侨以外嘅华侨都听埋一份。广东话同台山话都有自己嘅一套民歌，当中《南海潮》好多人都觉得系岭南嘅象征。岭南演艺重唔止有呢啲比较古老传统嘅嘢：由廿世纪中期开始，香港出咗好多用广东话嚟表达嘅流行歌同戏。呢啲歌甚至连喺西方世界都有人捧场。总体嚟讲，岭南嘅演艺可以话系极之丰富多元。
大戏
[编辑]
大戏（粤拼：Daai6 hei3），正式啲嗌做粤剧（粤拼：Jyut6 kek6），可以话系广东话传统演艺嘅代表。佢知名度高到畀人列咗入世界非物质文化遗产名录。大戏起源最迟系喺 16 世纪头，但系有好多历史学家话佢可以追溯到成 13 世纪尾嘅南宋时期：嗰时嘅中原戏曲跟住向南走难嘅汉人一齐落咗嚟，后嚟再受西欧音乐形响咗而变成今日嘅大戏。到咗今日，大戏已经进化咗做一种结合咗唱做念打、音乐、同埋戏服嘅舞台艺术。简单啲讲，大戏嘅技巧包括咗：“唱”－指“唱功”，系讲紧个大戏演员要识唔同嘅唱腔，重要配合自己演紧嗰个角色去拣返个啱嘅唱腔；“做”系指“做功”，要配合自己个角色嚟去表演，好似系手势、台步、走位、同抽象表演呢啲功架；“念”系指“念白”，要识得透过好好控制讲对白嘅语气同神情嚟去表达自己演紧嗰个人物；“打”系指“武打”，即系要喺讲打交嗰啲桥段嗰阵做舞水袖、揈水发、玩扇、或者系耍棍呢类大动作。
配乐
[编辑]喺音乐方面，大戏会用成四廿几种唔同乐器去搞配乐。呢柞乐器好多都系东方人普遍都会用嘅，好似系古筝或者琵琶呀咁。之但系呢柞乐器有啲都会有地方特色，例如系大戏用嘅梆子有分大中细，而且系空心长方形，叫做“南梆子”，唔似得北方咁用净系得一种大细嘅实心梆子。自从喺 19 世纪开始，大戏重开始咗采用啲西人嘅乐器，好似系小提琴咁。
行当
[编辑]大戏嘅行当（指演员个造型）有三部分：化妆、戏服、同头饰。大戏演员嘅化妆通常系白底，会画到对眉长一长重向上翘嚟表示威严，再喺白底上面加第啲色，而加咩嘢色喺旧时嗰阵就睇佢演啲乜嘢人物－红色代表血性忠勇，黑色代表刚耿忠直，白色代表奸恶阴险呀咁。大戏戏服早期嗰阵系用明朝嘅衫做板嘅，跟住嗰几百年嘅大清时期畀京剧影响咗，开始用大清嘅衫。除咗呢啲嘢，头饰亦系大戏演员一个好样眼嘅特征，女角会有好多簪、钗、梅花石、耳边花、凤冠呢类有传统女性味嘅做装饰，而男角嘅头饰就偏向用嚟表达佢哋嘅职业，好似系太子盔、扎巾、帅盔、驸马盔呢啲。
-
大戏花旦嘅造型 -
《帝女花》用嘅头饰 -
大戏用嘅梆子
民歌
[编辑]岭南嘅民歌（粤拼：Man4 go1）都好多样化[12]。由公元前嘅百越时期嗰阵，啲平民已经喺度作歌唱歌。到咗今日，岭南地区已经有好多种唔同民歌。净系讲广东话民歌就已经至少有珠三角嘅咸水歌、跳禾楼祭祀唱嘅卖鸡调、兴婚礼嗰阵唱嘅高棠歌、畀湘赣地区影响咗嘅粤北民歌、广州同东莞嗰带兴嘅粤调（分做粤讴、板眼、南音、木鱼歌、同龙舟歌五种）、用台山话唱嘅台山民歌、同埋好多嘅儿歌（好似系好多粤人细个都唱过嘅《小蜜蜂》）。当中嘅卖鸡调就有研究民族音乐嘅学者话佢有得追溯到去百越时期：卖鸡调传统系喺祭灵鸡嗰阵唱嘅，而呢种祭祀系由古百越族稻作文化嘅拜雀图腾演变出嚟嘅，所以讲得上系文化上嘅活化石。呢啲类型嘅民歌喺岭南地区都重有好多粤人唱同周围广播。除咗广东话民歌，岭南地区亦都有喺潮汕地区用潮州话唱嘅粤东渔歌，同埋用客家话唱嘅客家山歌。
一讲起广东话民歌一定会提嘅《南海潮》（粤拼：Naam4 hoi2 ciu4）嘅歌词，用唐字同粤拼写分别系：
- 红霞满洒粤天东破晓，
- 蒸蒸日上序华章，
- 红棉紫荆又添千百朵，
- 欣欣万世象。
- 我见江潮依然推起那舢板，
- 却是穿过玉宇琼楼新靓景，
- 我叫海潮波涛不要这汹涌，
- 隔住一片万里大洋归心切。
粤拼：
- Hung4 haa4 mun5 saa2 jyut6 tin1 dong1 po3 hiu2,
- Zing1 zing1 jat6 soeng5 zeoi6 waa4 zoeng1,
- Hung4 min4 zi2 ging1 jau6 tim1 cin1 baak3 do3,
- Jan1 jan1 maan6 sai3 zoeng6.
- Ngo5 gin3 gong1 ciu4 ji1 jin4 teoi1 hei2 naa5 saan1 baan2,
- Koek3 si6 cyun1 gwo3 juk6 jyu5 king4 lau4 san1 leng3 ging2,
- Ngo5 giu3 hoi2 ciu4 bo1 tou4 bat1 jiu3 ze5 hung1 jung2,
- Gaak3 zyu6 jat1 pin3 maan6 lei5 daai6 joeng4 gwai1 sam1 cit3.
岭南民歌试听：
粤语流行曲
[编辑]喺廿世纪中期开始，英属香港喺好多地方都发展得好快，香港人整咗好多戏同电视剧，入面啲歌都系用广东话嚟唱嘅。但系真系要数专系用广东话嚟唱歌就要去到 1970 至 80 年代。嗰时香港出咗郑君绵、邓寄尘、周聪、陈宝珠、萧芳芳呢柞歌手。佢哋唱嘅粤语流行曲（粤拼：Jyut6 jyu5 lau4 hang4 kuk1）题材好多样－有讲情情塌塌嘅，又有啲讲友情嘅。而且呢啲歌全世界都好多人听，卖到去成个远东地区－包括咗日本、韩国、台湾、同东南亚－甚至乎系去到西方世界。英文度重开始有咗个词，专系指粤语流行曲嘅－“Canto-pop”，又或者叫做“HK-pop”。呢啲歌令到广东话做咗普通话以外最多人知嘅唐话。但系由 1990 年代尾开始，HK-pop 喺个市场度开始唔够 J-pop （日本）同 K-pop （韩国）砌，到咗家阵都重系未见到乜嘢起色。
港产片
[编辑]港产片（粤拼：Gong2 caan2 pin3）即系香港人做导演拍嘅戏。呢柞戏多数都系用广东话嘅，但系都有啲国语片。香港喺廿世纪初头已经有喺度整啲默片，但系嗰时啲港产片质素唔高，好少可话卖到去外国。要去到成廿世纪中后期，香港出咗李小龙、许冠杰、同周星驰呢柞出名嘅演员港产片先至正式上到去国际舞台。嗰时港产片连西方都有人睇，但系佢个势同粤语流行曲一样：由 1990 年代尾开始，港产片喺国际市场度嘅竞争力开始下滑，而家重未有回升嘅迹象。
香港动画
[编辑]
由 1970 年代开始，香港人开始兴睇公仔书。初头好多时都系用打打杀杀嘅武侠或者黑社会做题材，但系好快就出现咗其他类型－例如系鬼故或者综合型－嘅漫画。冇几耐香港人重开始画卡通整动画。因为日本动漫喺粤港地区嘅后生仔后生女之间好有人气，加上佢哋又好多时会请日本啲公司帮手画，所以香港嘅动漫风格自然系畀日本影响咗。但系佢哋都有自己嘅特色，好似系题材好多时会拣一啲比较贴近社会生活嘅，例如系偏好描写香港人（以至粤人）嘅日常生活。
麦兜
[编辑]喺呢柞动漫作品入面，香港人作嘅麦兜（粤拼：Mak6 dau1）卡通人气零舍高。除咗岭南地区，喺成个东北亚都有人收睇，令到佢做咗香港动漫嘅代表人物。而且因为呢个系列嘅故仔里面成日有讲到某啲粤人独有嘅传统节日习俗同见到有岭南特色嘅建筑物，亦都令到呢套动画间接咁帮手宣传咗岭南同香港嘅传统文化。
文学
[编辑]岭南地区有自己一套文学风格。好似系诗（粤拼：Si1）咁，诗呢家嘢好讲语言嘅音韵。岭南有咁多独特嘅话，就当然会有自己一套诗词。而广东话喺诗词方面嘅历史好悠久，佢系唐宋汉人讲嘅语言－“中古汉语”－嘅直系后裔，有成千年历史，有好多大唐同大宋时期嘅诗词都系要用广东话嚟读先至会好听。而岭南东部地区好多人用嘅客家话同潮州话度都重见到好多上古汉语－重古老过中古汉语嘅唐话－嘅影。总括讲句，岭南地区嘅文学文化可以话系源远流长。
中古诗词
[编辑]唐诗（粤拼：Tong4 si1）同宋词（粤拼：Sung3 ci4）公认咗系古华夏史上最出色嘅诗词作品之一。而今日嘅岭南就保留咗最啱用嚟读唐诗宋词嘅话－广东话。现代广东话系现存咁多种唐话入面最近中古汉语嘅，读起中古时代嘅唐诗宋词上嚟重好押韵。相反，普通话系喺好近代先至出现嘅语言：由 12 世纪嘅宋朝时期后半橛开始，中原地带（北方）畀胡人大规模咁侵略，搞到北方嘅语言同文化喺好多方面都胡化咗。今日嘅普通话啲砌句子方式虽然重系似唐话，但系佢啲发音同埋用字就畀满清嘅满州话影响得好犀利，例如系喺中古汉语入面成日都听到嘅入声－即系用 p 、 m 、 k 做尾嘅音－喺普通话入面都唔见咗，搞到用普通话嚟读唐诗宋词好多时都押唔到韵。相反，因为岭南地区离胡人好远，好似系广东话、客家话、同潮州话呢啲岭南地区嘅唐话就保留咗呢啲音。
唔单止系咁，岭南嘅人喺超过一千年前开始已经喺度作诗作词。大唐其中一个最有料到嘅大诗人张九龄（678-740 年）就系岭南出身嘅－佢喺韶州曲江（今日嘅广东韶关）出世。张九龄系嗰时嘅广州都督个仔。据讲佢好细个嗰阵已经好醒目，后尾重坐埋宰相个位。佢一世人写咗好多诗，当中佢嗰十二首《感遇》，畀人列咗喺《唐诗三百首》嘅开头。继张九龄之后，后嚟岭南喺 9 世纪嘅唐朝尾又出咗个朵冇张九龄咁大，但系都叫有啲名气嘅邵谒同陈陶。当中邵谒出咗名写起诗上嚟唔用花巧修辞，好朴素。好似系佢写嘅《岁丰》：
- 邵谒《岁丰》
- 皇天降丰年本忧贫士食。
- 贫士无良畴安能得稼墙？
- 工佣输富家日落长太息。
- 为供豪者粮役尽匹夫力。
- 天地莫施恩施恩强者得。
自从嗰时开始，粤人就一路都有写诗词，出咗唔少有影响力嘅诗人，而且重有咗嗰名叫“岭南诗派”（粤拼：Ling5 naam4 si1 paai3）－出嗮名睇重保留唐朝发音，又会揾啲有关地区风土嘅题材写诗，保留到大唐嘅遗风得嚟又有本土特色。除咗呢样，民间嘅文人雅士得闲都会写吓诗词嚟开心吓，或者系喺有啲乜嘢大事嗰阵作返对对联嚟贺吓佢或者纪念吓，例如系喺大家族嘅祠堂嘅门口度好多都会写对对联嚟畀人睇吓佢哋几有文化。
近代诗词
[编辑]岭南三家
[编辑]嚟到摩登时代，岭南喺 17 世纪嘅时候出咗现实主义嘅岭南三家（粤拼：Ling5 naam4 saam1 gaa1）－屈大均、陈恭尹、同梁佩兰呢三个诗人。佢哋好多时都系写诗去歌颂反抗满清嘅明朝将领或者系描绘当时嘅平民畀清政府压榨得有几惨。好似系屈大均喺廿八岁北上去旅行嗰阵有感而发写嘅《鲁连台》，就会令读嗰个人觉得个景有啲凄凉：
- 屈大均《鲁连台》
- 一笑无秦帝，飘然归海东。
- 谁能排大难，不屑计奇功。
- 古庙千秋月，荒台万木风。
- 从来天下士，只在布衣中。
口语粤诗
[编辑]岭南诗派出咗名革新。除咗呢啲古雅啲嘅作品，再近期啲嘅岭南诗人重好够胆去搞新谂头－喺 19 世纪，岭南开始有诗人用口语化嘅广东话嚟去写诗[13]。当中最有代表性嘅应该要数广东惠阳出身嘅廖恩焘（1863-1954 年）。佢嘅作品《嬉笑集》[14]里面嘅诗就好明显睇得出系用咗口语化嘅广东话，一啲都唔会畀人有文邹邹嘅感觉。好似系佢写嘅《秦始皇》就好通俗大众：
- 廖恩焘《秦始皇》
- 荆轲吓失佢三魂，好在良官冇搬亲。
- 野仔执番条烂命，龟公害尽几多人。
- 监生点解嚟陪葬，临死唔知仲拜神。
- 万里咁长城一座，后来番鬼当新闻。
- 六国吞埋擸吓须，安心就咁著龙袍。
- 收齐烂铁烧铜像，堆起新书透火炉。
- 过海点嚟求味药，当天仲去贴张符。
- 既然慌到江山冧，生仔唔该叫阿胡。
粤诗文献
[编辑]有好多证据都显示岭南嘅诗其实唔净止得呢啲。而家喺广东有人响度搞紧一个叫做《全粤诗》（粤拼：Cyun4 jyut6 si1）嘅文献，谂住想记录嗮自古以嚟所有嘅粤诗，已经出咗三十册，收录嗮大明时期同打前嗰啲粤诗。佢哋系遇到啲阻滞，但系而家重系有喺度进展紧。
香港文学
[编辑]香港文学（粤拼：Hoeng1 gong2 man4 hok6）系由廿世纪开始喺政治经济环境特殊嘅香港产生出嚟嘅文学文化。香港话就话畀人嗌做“文化沙漠”，但系查实香港人写嘅文学喺唐文世界以至成个国际社会都有啲地位。啱啱开头嗰阵，香港文学主要系由啲喺广东或者佢周围地区走难落嚟嘅文人写嘅。佢哋都系喺一个中原地区打仗打到七国咁乱又畀外国人哈嘅时代大嘅，所以佢哋写啲嘢好多时都系喺度呻自己要屈喺香港呢笪“南蛮之地”，或者系讲吓自己嘅爱国情怀。但系响廿世期中期嗰阵，香港进步得好快，啲文人就开始会谂去写一啲有香港本土特色嘅嘢，好似系马朗写嘅《太阳下的街》，就用咗 1956 年嘅九龙暴动做背景。因为嗰时嘅香港同其他亚洲地区比起上嚟叫做自由开放啲，香港人谂嘢写嘢可以冇乜顾忌，加上同西人交流得多，出咗两派思潮－主张要跟美国学嘢同用美国人风格写嘢嘅“绿背文化”同埋反对呢种谂法嘅“左派”。再打后啲嗰几廿年，香港嘅作家喺呢种自由嘅风气之下同嗰时飞跃紧嘅香港电影电视业一齐搞嘢，将佢哋写嘅其中一啲故仔拍做戏或者电视剧，出咗柞有睇头嘅作家[15]。
睇体裁嘅话，香港文学嘅特色系钟意揾现实做主题，佢哋啲题材好贴近社会同生活，恋爱故仔同埋系讲社会生活嘅散文普遍都受欢迎－好似系人气作家张小娴同陶杰呀咁。但系香港都有出过第啲体裁嘅作家，好似系写武侠嘅金庸同古龙，重有系写科幻嘅倪匡。而喺近呢几年，香港开始兴网上小说，喺后生之间好有人气，开始有唔少后生作家搞，令到佢做咗 80 同 90 后嗰代香港文学嘅新兴势力。总体嚟讲，要数香港文学嘅主要作家嘅话有：
- 张小娴，写言情同散文；出名嘅作品包括《面包树》系列同《都会爱情》系列。
- 陶杰，出咗名推崇欧美文化；佢主要写啲讲文化嘅嘢，好似系喺报纸杂志度写啲讨论西人文化嘅文。
- 金庸，主打武侠；佢出咗《天龙八部》同《神雕侠侣》。
- 古龙，都系打武侠；佢嘅代表作有《楚留香传奇》同《小李飞刀系列》。
- 倪匡，主打科幻；佢系好出名嘅《卫斯理》系列同《原振侠》系列嘅作者。
粤文文学
[编辑]虽然话香港有唔少有本事嘅作家，但系用自己嘅白话写文学都重系少见。喺呢方面，成个岭南地区同其他东北亚地区－包埋韩国同越南－好似，传统嚟讲“语”同“文”系分开嘅：讲嘢用各自嘅本土白话，写嘢就用文言文。要喺成 19 世纪尾，呢一头先开始有人正式咁用白话化啲嘅文字嚟写文学。之不过，大中华地区都重系离唔开用中文书面语－而中文书面语系攞普通话做板嘅，唔算系岭南地区嘅白话。呢一样嘢香港都走唔甩。头先提咗嘅作家写嘢冚唪唥都系用中文书面语，而唔系用粤文。但系喺廿一世纪开始有人主张用粤文嚟写文学[16]。
饮食文化
[编辑]
饮饮食食系人生存落去一定要做嘅嘢，所以佢系一种包含嗮科技、自然、同人文嘅文化遗产。岭南唔单止有独特嘅地理环境，而且重成日同外界嘅人做嘢，会发展咗自己一套嘅饮食文化一啲都唔出奇。岭南地区背住座山，对住个海，有成 3368 公里长嘅海岸线，天气又暖又湿立立，成日都出太阳－无论系捉鱼定系种菜都会好好收成。咁好天然条件，岭南嘅人就有得用好多唔同嘅食材嚟煮嘢食，好似系屈大均（17 世纪）嘅《广东新语》就有咁讲：“天下所有食货，粤东几尽有之，粤东所有之食货，天下未必尽也。”呢啲文化重有得追溯到去好耐之前嘅百越时期：喺超过一千年前，自从喺南越国冧咗之后，有唔少汉人都会去岭南地区做官或者长住，佢哋唔止将嗰时嘅中原饮食文化带咗去岭南，写嘢嗰阵重会跟手提吓岭南嘅本土饮食风俗。好似系响 9 世纪帮唐昭宗做司马嘅刘恂咁，佢喺岭南度做咗一轮嘢，写咗《岭表录异》嚟记录嗰一带嘅风土人情。呢本嘢入面有讲到当地人嘅饮食习惯，提咗佢哋钟意食“蚝蛎”同“水牛肉”呀咁。
广东菜
[编辑]
广东菜（粤拼：Gwong2 dung1 coi3），又叫做广州菜（粤拼：Gwong2 zau1 coi3），正式啲嗌做粤菜（粤拼：Jyut6 coi3），系指广东同港澳一带嘅粤人独有嘅传统𩠌菜同埋煮𩠌方法。根据历史学家研究，广东菜系喺 10 至 13 世纪嘅南宋时期大致上有咗今日见到嘅样嘅。嗰时汉人移民潮正值高峰。呢班汉人入面有御厨，佢哋就将嗰时中原嘅煮嘢食技巧带埋去岭南，跟手就同百越族嘅固有饮食文化融合埋一齐。打后岭南做明朝嘅港口嗰阵成日都同西人或者东南亚人交流，令到广东菜又进化咗少少。今日嘅广东菜已经好多姿多彩。佢成个食谱好长，喺 1965 年嘅“广州名菜美点展览会”就数到有成 5457 种𩠌菜咁多。而且广东菜好多人都觉得好好食，畀中国封咗做佢八大菜系之一。广东菜甚至喺国际社会都有啲地位：粤人喺近期历史度好多次大规模咁移民去外国，令到广东菜做咗世界上其中一种最多人识嘅美食。
广东菜有几个特别嘅地方。首先，佢喺用料方面好开放，虽然佢话就话主要系用猪肉、牛肉、禽肉、同水产，但系查实佢无论系鱼虾蟹定系各种飞禽走兽（甚至乎系昆虫）都有机会用－几乎乜都可以攞嚟煮𩠌。所以粤人嘅饮色文化入面重有咗“野味”呢个词语，专系用嚟形容一啲另类啲嘅食材，好似系蛇、老鼠、狸猫呀咁。喺口味方面，广东菜嘅口味主要系“清鲜嫩爽”，除咗“甜酸苦辣咸”之外重会讲求“鲜”。调味嗰阵睇重配合食材原本嘅味嚟煮，唔钟意太辣嘅嘢，亦都偏好落少啲香料－呢几样嘢令到佢同四川菜形成到好强烈嘅对比。广东菜入面嘅𩠌菜多数都净系会落少少姜、葱、糖、盐、豉油、米酒、淀粉、油、八角、或者肉豆蔻嚟去调味，间唔中或者会加啲五香粉同白胡椒粉，净系煮内脏嗰阵会系咁咦落重啲蒜头呢类香料。佢哋为咗保留食材原本嘅味道，好兴用清蒸。所以广东菜啲味一般都唔会好浓。喺烹调方面，广东菜有成廿一种烹调方法咁多，除咗头先提咗嘅清蒸，广东菜重好叻用炒、煎、焗、焖、炸、煲、炖、同扣呢啲方法。佢哋煮嘢好讲究火侯、镬气、同埋“即炒即食”，会要求整出嚟嘅𩠌菜有齐“色香味形”。
出名𩠌菜
[编辑]老火汤
[编辑]老火汤（粤拼：Lou5 fo2 tong1），俗啲嗌做“老火靓汤”，系广东菜嘅特色。因为岭南天气又热又湿，令到粤人传统嚟讲都钟意饮多啲汤水嚟补吓身－喺传统广东菜入面，汤水嘅比例通常都比较高。而老火汤呢家嘢就系粤人喺近呢二三百年开始兴煲嘅。据讲喺 18 世纪嗰阵时，广东地区唔系好开发到煤炭，搞到广东人唔理系煮嘢食定系炼铁都要斋用柴嚟生火。于是广东人就焗住悭住啲咁去用火，响煮𩠌嗰阵唔敢大炒大煎，改做用慢火煲汤煲粥－就出咗老火汤呢味嘢。老火汤通常系攞个煲将啲菜、肉、生果、或者药材熬成几粒钟整出嚟，好有营养，重有护肤、护心、明目、降胆同健骨嘅效用。今日嘅粤人成日都会煲老火汤嚟饮。
饮茶文化
[编辑]粤人出嗮名钟意饮茶（粤拼：Jam2 caa4）。响岭南地区，饮茶系一种饮食文化，但同时亦都系一种民俗文化：粤式茶楼唔单止有自己一套嘅饮食风格，饮茶同时重系粤人嘅一种传统礼节。粤人喺有客人嚟探自己嗰阵，好多时候第一样要做嘅就系“奉上一杯靓茶”，而“请饮茶”基本上就系佢哋表示热情嘅方式。粤人嘅饮茶文化重有一柞专属嘅词语，好似系“搭台”、“茶友”呀咁－已经系一种次文化。
传统嚟讲，粤人无论朝头早、晏昼、定系夜晚都可以去饮茶。饮早茶通常系老人家多，佢哋好多时喺朝早五点零六点晨运完之后就会成班茶友一齐去茶楼度揾张台坐埋一围，一路饮茶一路食点心一路倾闲偈。稍为晏少少嘅九点几时段，有唔少后生仔后生女就会陪自己嘅阿爷阿嫲饮茶。下午茶嗰阵啲嘢食同做法同早茶差唔多，但系就比较多系成家人一齐饮。而夜晚嗰阵嘅茶楼通常会有雅座同包厢－好多时就会有啲大型啲嘅聚会，呢个时候啲人嗌嘅嘢食亦都会偏向豪华啲。但系无论系边种饮茶，开头嗰阵要做嘅嘢都系“开茶”－揾张台坐低，拣自己想饮啲乜嘢茶，再叫个伙记“冲茶”，茶嚟咗之后就会嗌点心，成班人重会一路饮饮食食一路倾闲偈，最后食完就埋单。
点心
[编辑]点心（粤拼：Dim2 sam1）系粤人饮茶嗰阵一定会有嘅嘢食。“点心”呢个词语最早喺 11 世纪出现。《唐书》入面就有咁样讲：“唐郑为江淮留侯，家人备夫人晨僎，夫人谓其第曰：治妆未毕，我未及餐，尔且可点心。”呢句嘢嘅意思系话一家人准备食早餐，重未开饭，女主人同佢细佬讲话佢重未梳好妆，叫佢等一阵，食住啲小食医肚先。而点心呢类嘅食物历史好悠久，早喺公元前 500 年中原地区已经有记载民间有啲类似嘅小食，后嚟再传咗去岭南同慢慢咁演变做今日嘅点心。粤式点心好多时系用蒸笼嚟上嘅。佢哋有好多种，可以细分做蒸点、炸点、包、肠粉呀咁。点心系粤式饮食文化不可或缺嘅一个组成部分－广东同香港呢啲地方都有厨艺学校会开班专系训练点心师傅。
凉茶
[编辑]
凉茶（粤拼：Loeng4 caa4）系岭南独有嘅一种嘢饮。岭南地区又热又湿，而且粤人又钟意食埋嗮啲煎炸嘢，搞到佢哋成日都话咁易就热气。于是民间就兴起咗用啲药性寒凉又消暑嘅草药煲水，然后再摊冻嚟饮－呢啲清凉又有补身效用嘅嘢饮就系凉茶。凉茶有好多唔同款，比较多人识嘅有廿四味、五花茶、雪梨茶、感冒茶、同埋火麻仁呀咁。佢哋喺岭南地区好有人气。广州同埋港澳地方都开咗好多专系卖凉茶嘅凉茶铺，无论大人定系细路都有人帮衬。呢三个地方嘅政府甚至重喺 2006 年成功咁争取令到中国国务院将凉茶列做国家级非物质文化遗产。
糖水
[编辑]糖水（粤拼：Tong4 seoi2）系岭南饮食嘅其中一个特色，泛指一啲液态嘅粤式甜品。糖水嘅历史源头而家已经查唔到，但系广州嗰一带似乎系喺重未汉化嗰阵已经有啲类似糖水嘅嘢，而 10 至 13 世纪嘅南宋时期亦都有文献提过佢吔嘅市集有卖一啲叫做“凉水”嘅甜味嘢饮。同中原地带嘅甜汤比起上嚟，糖水一般都会杰啲，所以粤人通常都会讲“食糖水”而唔系“饮糖水”。响岭南地区，糖水有好多款，通常系用嚟喺晚餐做饭后甜品或者做消夜。佢哋热食或者冻食都得，而且粤人食糖水重会睇时令：夏天会食绿豆沙清热，而冬天会食芝麻糊。喺岭南地区，除咗用嚟食，糖水重有喺传统习俗入面担当一啲角色：广东人喺结婚新郎新婚拜完天地之后就会坐喺床边，等主婚人请好命婆将亲友送嚟房度嘅红绿筷子撒向帐前帐顶度，跟手个好命婆就会捧住莲子羹喂新郎新婚食，有“连生贵子”咁嘅意思。
酒文化
[编辑]岭南嘅酒文化好耐历史。考古学家发现喺新石器时代嗰阵，岭南地区嘅人已经有整生果酒，而南越国嘅遗物当中亦都揾到有用嚟装酒嘅容器。后嚟喺 11 世纪嘅宋朝时期，出咗名钟意饮酒嘅文人苏东坡畀人贬咗去岭南之后冇几耐就写咗岭南第一本讲酿酒嘅书－《东坡酒经》。喺 15 世纪嘅大明统治之下，岭南嘅酿酒业开始全面咁发展，开咗好多酒行会馆，好似系佛山酒行会馆就出咗名因为水质好、米料够所以出到好酒。到咗今日，岭南已经出紧好多唔同嘅酒。岭南米酒系岭南嘅一种名产；广东十大名酒亦都好有人气，尤其系当中嘅玉冰烧个势特别劲。而传统上，岭南喺婚礼同埋佛山嘅秋色祭亦都会用到岭南酿嘅酒。
响 2014 年，佛山开咗间岭南酒文化博物馆嚟介绍岭南嘅酒文化。
传统节庆
[编辑]
粤人有好多传统节庆。当中有啲系其他东方人都会庆祝嘅，例如系盂兰节咁，就连日本人同好多东南亚族群都会庆祝。但系粤人好多时会有一啲独有嘅习俗：好似系过年嗰阵行花市呢家嘢喺粤人以外嘅华人族群好少见。粤人又会特别睇重某啲节日，好似系佛诞咁：因为传统粤人都系信佛多，所以佛诞会大搞，但系反而唔会点样理孔圣诞。总括嚟讲嘅话，岭南嘅传统节庆有：
唐式节庆
[编辑]- 粤式过年传统：
- 其他唐式节日：
地方节庆
[编辑]- 广州菊展（有分春展同秋展）
- 广府庙会（广州）
- 广东欢乐节（广州）
- 佛山秋色赛会（佛山）
- 卖身节（东莞）
- 羊城荷花节（番禺）
- 番禺水色（番禺）
- 风筝节（阳江）
- 长洲太平清醮（香港）
- 车公诞（香港）
- 香港许愿节（香港）
- 飘色巡游
- 南海神诞
- 天后诞
- 谭公诞
- 北帝诞
- 冼太诞
功夫
[编辑]
岭南嘅人由中世纪后半橛开始就有创作好多打交技巧，但系嗰阵时啲门派好乱，分得唔清唔楚，要去到 18 至 19 世纪先至有清析嘅门派可言。嗰时嘅大清政府管唔掂个国家，搞到好似广东广西呢啲边界地方好多贼仔同海盗喺度搞搞震。于是粤人为咗保护自己同埋屋企人，就开始兴学打交。呢个潮流令到岭南嗰头开咗成柞功夫馆，而且粤人重顺手执咗吓佢哋啲打交技巧，将佢哋已经识嘅技术整理分类好－两广嘅南拳门派（指长江以南地区嘅功夫流派）就成咗形。嗰阵时粤人重出咗好多好似广东十虎呢类嘅传奇性嘅高手同英雄，当中以黄飞鸿最出位，好多港产片同电视剧都有拍佢嘅事迹[17]。
总体嚟讲，岭南嘅功夫派别主要特色系讲究啲桥（指上身）法要多变同埋个马（指下身）要扎得又稳又阔，会用大嗌嚟助威，好少可会跳跃或者起脚，冇乜华丽嘅大动作，讲究实用－有务实嘅岭南特色[18]。到咗今日，岭南嘅功夫流派有[19]：
广东南拳
[编辑]广西南拳
[编辑]哲学思想
[编辑]岭南甚至重有自己嘅一套宋明理学流派。由 11 世纪开始，宋明理学就越嚟越多人研究，好快就连日本、韩国、同埋越南嘅儒学者都搞埋一份。呢种学问基本上系借咗儒家嗰套思想，再加啲佛教同道教嘅嘢嚟去将儒家思想重新谂做一啲包含咗人道主义同理性主义嘅新思想。喺 12 世纪嗰阵，崔与之（号菊坡）创立咗菊坡学派，令到岭南开始有咗属于自己嘅一套哲学思想体系。打后嗰几百年，岭南嘅哲学就一路有发展，出咗一班几有料到嘅思想家。
岭南学派
[编辑]
岭南学派（粤拼：Ling5 naam4 hok6 paai3）可以讲得上系岭南哲学入面最有代表性嘅一个流派。佢系一班岭南出身嘅文人响 15 世纪嗰阵开嘅一个宋明理学流派，佢嘅代表人物系广东新会出身嘅哲学家陈献章（外号叫白沙先生）。佢写嘅哲学文家阵好详细咁样收录咗喺《陈献章集》入面。喺呢啲文入面，陈献章表达咗佢嘅思想，佢主要系主张“自得”同“以心为主”。陈献章系咁讲：“子之所得者有如此，则天地之始，吾之始也，而吾之道无所增；天地之终，吾之终也，而吾之道无所损。天地之大，且不我逃，而我不增损，则举天地间物既归于我，而不足增损于我矣。”佢认为只要人一确立咗自己嘅主体性，就可以唔理外在嘅控制而同天地和谐共存，甚至乎系去控制返天地转头，而天地万物亦都系要有人嘅主体性先至会有自己嘅价值同意义。呢种算系几有个人主义味道嘅思想，而呢种倾向亦都反映到喺岭南学派嘅其他方面－佢哋重主张人要独立思考，叫人应该多啲去挑战固有嘅谂法，反对人云亦云，好似系陈献章又曾经咁样讲：“学贵知疑，小疑则小进，大疑则大进，疑者觉悟之机也。”意思系求学问最宝贵嘅嘢系要学识去质疑，越识得质疑就越会有进步。总体嚟讲，呢个学派系借咗儒家嘅人本精神，但系又会好似道教咁样睇重讲人同自然之间嘅关系，甚至可以话系有啲畀西人嗰种睇重问问题嘅谂嘢方式影响咗。
甘泉学派
[编辑]陈献章嘅徒弟湛若水（外号湛甘泉）后嚟重攞佢师父嗰套思想去创立咗一个新嘅甘泉学派（粤拼：Gam1 cyun4 hok6 paai3）。湛若水佢喺唔少方面同意佢师父嘅谂法，但系觉得佢师父嘅某啲主张太似禅宗佛教（好似系陈献章钟意用静坐嚟修养咁），而且佢对其他嘅学派（尤其系阳明学派）重有自己嘅一套批判。
其他学派
[编辑]除咗呢柞宋明理学流派，岭南亦都出咗东塾学派（粤拼：Dong1 suk6 hok6 paai3）同八桂学派（粤拼：Baat3 gwai3 hok6 paai3）等嘅思想流派。
宗教信仰
[编辑]
同其他东北亚族群好似嘅系，粤人传统嚟讲乜都会拜：佛教（主力系大乘佛教）、道教、好多派嘅基督教、回教、同埋好多自然崇拜喺呢一头都有唔少嘅信徒。以一个东方地区嚟讲，岭南特别多经海路由西面传入嚟嘅宗教－佛教、唔同派嘅基督教、同埋回教；咁亦都系反映咗粤人传统上特别多同外面嘅世界交流。
大乘佛教
[编辑]比起拜孔孟，粤人多数都系钟意拜佛或者拜观音多啲。呢样嘢系沿袭咗大唐嘅文化－唐系中国史上最睇重佛教嘅朝代。唐三藏去印度学完佛之后返咗去大唐，将佢学到嘅嘢周围教畀嗰时嘅汉人，啲汉人加咗啲自己嘅嘢落去，做出咗有汉文化风格嘅大乘佛教（粤拼：Daai6 sing4 fat6 gaau3）。大乘呢个词有“普渡众生”嘅意义，系主张修道者要识得有菩提慈悲心，为咗众生着想而唔入涅槃住，改为留喺人世度教化其他生灵－而呢啲充满慈悲心嘅人就系所谓嘅菩萨。大乘派嘅佛庙喺岭南地区周围都系，而且佛诞同埋观音诞呢啲都系属于喺粤文化入面都几重大嘅节日。
道教
[编辑]喺岭南嘅主要宗教入面，得道教（粤拼：Dou6 gaau3）系经陆路由北面嘅中原地区传入嚟嘅。道教思想喺度有唔少影响力，好似系拜城隍、拜土地公、拜华光大帝、或者系风水文化呀咁，都系由道教嗰度搞出嚟嘅。道教嘅主要思想喺公元前 500 几年嗰阵喺中原嗰头发迹，后嚟传嗮去成个东北亚，喺日本、韩国、同埋越南都有一定嘅影响力。呢个教主张人要跟随“道”去做修行，最后达到“天人合一”嘅境界。而所谓嘅“神仙”就系修行境界极之高嘅人，高到晓飞天遁地同埋有好多法力，而啲人拜佢哋就系为咗想要佢哋保佑。
喺呢方面，岭南都有啲自己嘅风格，会拜一啲有本土特色嘅神：黄大仙多数系粤人先会拜嘅；而且粤人重好兴去拜啲好似南海神洪圣同妈祖呢一类嘅海神－同内陆地区唔同，反映咗粤人传统兴经海路搞生意嘅文化。
.jpg)
其他教
[编辑]除咗大乘佛教同埋道教呢类有东方色彩啲嘅教之外，基督教（粤拼：Gei1 duk1 gaau3）同埋回教（粤拼：Wui4 gaau3）喺岭南都有一定数量嘅追随者。喺 15 到 16 世纪嗰阵，岭南系大明嘅主要对外港口，有唔少西欧嘅商人会喺呢一头设置自己嘅基地，咁西欧嘅基督教教派（即系天主教同新教，但重有其他细啲嘅教派）会跟手传埋入嚟一啲都唔奇。而喺再早啲嘅时期，嚟自阿拉伯同波斯嘅商人都有喺岭南一带度搞生意，佢哋嘅回教自然跟住佢哋一齐入埋嚟。最后，香港喺 18 到 19 世纪做英国殖民地嗰时，有唔少南亚嘅人去咗香港嗰度打工，令到佢哋嘅信仰－好似系印度教、锡克教、同拜火教呀咁－传咗嚟。总括讲句，岭南喺宗教方面可以话系百花齐放。
次文化
[编辑]冼夫人文化
[编辑]冼夫人（粤拼：Sin2 fu1 jan4）系喺岭南民间好多人识嘅历史人物，重畀人嗌做“岭南圣母”。佢本名叫亚英，系公元 6 世纪嗰阵岭南嘅百越族当中一个有本事嘅领袖同军事家。佢喺隋朝时期帮中原嘅皇朝手打冧咗嗰时喺岭南度割据一方嘅陈朝，后嚟又平定咗几场百越族人嘅作反，最后帮中原皇朝手成功咁控制住岭南地区同埋开始咗呢一头嘅汉化过程，间接系帮咗岭南进化成今日嘅样。现代嘅岭南民间间唔中都会搞活动嚟去纪念冼夫人嘅功绩，重起咗啲叫冼太庙嘅建筑物－直头有啲当咗冼夫人系神咁拜。
袁崇焕文化
[编辑]袁崇焕（粤拼：Jyun4 sung4 wun6；1584 年6月6号 - 1630 年9月22号）系岭南一个好重要嘅历史人物。佢喺东莞出世，系大明末期一个好重要嘅反清将领。佢喺 1619 年嗰时中咗进士，后嚟调去兵部守山海关同辽东，创咗好多战绩同帮手搞咗好多军事工程。但系喺崇祯手下畀人屈佢话佢系内鬼，搞到畀崇祯判佢凌迟处死。虽然系咁，佢响好多粤人心目中都系一个英雄人物。岭南地区周围都有佢嘅纪念馆，而佢嗰句金句“掉哪妈，顶硬上！”（注：呢句系广东话粗口）。基本上喺岭南冇人唔识。后嚟佢句嘢喺 2010 年 7 月畀人凿走嗰单嘢重触发咗广州撑粤语行动。
粤商
[编辑]粤商（粤拼：Jyut6 soeng1）系指一啲由粤人组成嘅商帮。响历史上近呢二千年嚟，岭南（尤其是系广州嗰头）喺好几个朝代都系做中原皇朝嘅对外港口[20]，令到粤人有咗一种好强嘅商业文化，出咗好似广州十三行呢类出名嘅商帮，而且重有一套自己嘅行商之道[21]：粤商出咗名会当关公系财神咁嚟拜，喺行商手法上会讲实用，做生意嗰阵会避开政治嘢，注重结果同实利多过虚名，低调唔钟意出风头，硬系惊畀人打劫所以会讲“财不可以露眼”，而且知足又自强。到咗今日，粤人重系传承紧粤商文化，好似系广州、香港、佛山、同深圳呢啲岭南主要城市都系大商埠，会搞好多金融同工业生意：好似系香港咁，直到 2016 年，香港嘅全球金融中心指数（Global Financial Centres Index，简称 GFCI）去到成 748 －系全世界第四，只系低过伦敦同纽约市少少[22]。
象征物
[编辑]-
春天盛开紧嘅木棉花 -
迫满嗮三板嘅广州港口 -
盛开紧嘅洋紫荆
_flowers_in_Kolkata_W_IMG_4116.jpg)
.jpg)
木棉花
[编辑]木棉花（粤拼：Muk6 min4 faa1）好多时都畀人觉得系最代表到岭南嘅花。岭南嘅木棉文化有得追溯到去百越时期：据讲公元前 200 年嗰时，南越国嘅国王赵陀曾经送咗棵木棉树畀统治紧中原嘅汉皇朝嚟表示敬意－即系话喺嗰时岭南嘅人已经有用紧木棉嚟代表自己乡下。到咗今日，木棉已经系粤文化入面好重要嘅象征物，成日都喺粤人作嘅诗歌或者散文度出现，好似系《南海潮》呢首民歌就用咗“红棉”嚟代表粤文化。亦都有粤人攞木棉树嚟同英雄比较，话佢树干又大又粗，又成日生得高过嗮周围啲树，重就咁帮佢改咗个花名叫“英雄树”。
木棉家阵已经做咗岭南文化大城广州嘅市花。
喺西化嘅香港，木棉文化都有啲影响力。好出名嘅粤语流行歌手罗文有作咗首叫《红棉》嘅歌，专系讲木棉嘅。除咗咁，喺香港公园嘅红棉路婚姻注册处系香港人嘅结婚热门地点。
三板
[编辑]三板（粤拼：Saam1 ban2），又叫做舢板，系南中国海沿岸度成日都会见到嘅一种木造嘅平底艇仔。呢种艇仔粤人、福佬人、越南人、同埋好多东南亚民族都会用。佢哋通常系三米半到四米左右，好多时会加个篷，重住得人。好多渔民会住喺三板度方便佢哋做嘢，令到好似系广州同香港呢啲岭南嘅沿海城市成日都会有一大柞三板泊嗮喺个港口度，系好有本地特色嘅景象。三板喺粤人作嘅歌或者拍嘅戏度耐唔耐就会蒲头，令到好多人觉得佢系岭南文化嘅象征物之一。
《南海潮》呢首民歌入面都有提咗“舢板”。
洋紫荆
[编辑]洋紫荆（粤拼：Joeng4 zi2 ging1）可以话系香港嘅象征。佢喺 1880 年嗰阵畀一个神父发现，后嚟喺 1908 年畀学界判定系新嘅品种，喺 1965 年正式做埋香港嘅市花。而喺 1997 年主权移交之后，洋紫荆图案重出现咗喺香港嘅特区区旗嗰度。始终香港系出咗好大柞好似系戏、电视剧、同流行歌呢类嘅文化产物嚟宣传粤文化，令到香港畀好多粤人觉得佢系现代粤文化嘅代表。因为咁，洋紫荆有时会畀人觉得同粤文化好有关系，例如系《南海潮》呢首歌度都有提咗“紫荆”嚟去代表粤人同埋粤文化。
香港嘅金紫荆广场有座好大嘅金色洋紫荆雕像，系香港嘅地标之一。
睇埋
[编辑]
岭南风俗
[编辑]相关文化
[编辑]其他
[编辑]考
[编辑]- ^ Loewe, Michael (1987). "The Former Han Dynasty". The Cambridge History of China, Volume 1: The Ch'in and Han Empires, 221 B.C.–A.D. 220. Cambridge: Cambridge University Press.
- ^ 中國評論學術出版社. hk.crntt.com.
- ^ 岭南园林的营造手法与艺术特色_建筑规划_中国百科网. www.chinabaike.com.
- ^ 南园莲池/志莲净苑 仿照唐代艺术的古式园林与佛教庙宇～
- ^ The Art of Lingnan School, 嶺南畫派的繪畫藝術. www.lingnanart.com.
- ^ Croizier, R. C. (1988). Art and Revolution in Modern China: the Lingnan (Cantonese) school of painting, 1906-1951 (Vol. 29). Univ of California Press.
- ^ 中國評論新聞：嶺南書法與書法家. hk.crntt.com.
- ^ chinanews. 西汉南越王墓玉器（图）——中新网. www.chinanews.com.
- ^ ‘锦绣岭南’四大名绣之粤绣艺术展
- ^ 香港僅存廣彩瓷廠 首度展覽經典瓷畫 - Scarcity. 2016-09-29.
- ^ 佛山剪纸专题网站.
- ^ 中國評論新聞：嶺南民歌知多少？. hk.crntt.com.
- ^ 談廣東方言的格律詩. www.cantoneseculture.com.
- ^ 嬉笑集 - 粵典文庫.
- ^ 香港文學資料庫. hklitpub.lib.cuhk.edu.hk.
- ^ 香港中國語文學會. www.huayuqiao.org.
- ^ 武侠小说《武坛二虎 》自序里的广东十虎
- ^ 岭南南派武术技术特征的文化研究
- ^ Sensei/Renshi Nathan Chlumsky. Inside Kungfu: Chinese Martial Arts Encyclopedia. Lulu.com. 2015. ISBN 13-2911-942-8.
- ^ 千年粤商
- ^ Cheng, Y. H., & Huang, P. Y. (2008). A Review of the Research on the Culture of Cantonese Merchants [J]. Journal of Guangdong University of Business Studies, 3, 013.
- ^ The Global Financial Centres Index 19. Long Finance. March 2016.
出面网页
[编辑][[Category:嶺南文化| ]]